اكتشف مزايا الغاز الطبيعي في تحويل السيارات للعمل بالغاز الطبيعى والشروط والتكاليف المطلوبة
يشهد سوق السيارات في مصر انتعاشا ملحوظا في الإقبال على تحويل السيارات للعمل بالغاز الطبيعي، في ظل الارتفاع المستمر في أسعار البنزين، المواطنين بقوا يدوروا على وسيلة موفرة وسهلة تريحهم من أزمة البنزين الخانقة، وحكاية الغاز الطبيعي بقت حديث الشارع بين أصحاب العربيات، كتير من الناس عندها أسئلة وبتحاول تفهم إمتى وليه وفين تقدر تحول عربيتها للغاز، وهل الموضوع آمن فعلا ولا في مخاطرة؟ كل التفاصيل دي بنحاول ننقلها لكم كما هي، من مصادرها الرسمية، وبلسان الناس اللي جربوا وحكوا.
كل السيارات ممكن تتحول للغاز
الموضوع ببساطة إن كل السيارات اللي شغالة بالبنزين تقدر تتحول تشتغل بالغاز الطبيعي بدون أي مشاكل، يعني لو معاك عربية قديمة أو جديدة ما تشغلش بالك، فيه أنظمة متوافقة مع كل الموديلات والأنواع، ومن الحاجات المهمة جدا والكلام ده قالته وزارة البترول إن تحويل العربية للغاز مش معناه إنك هتلغي البنزين تماما، لا خالص، التحويل بيعتمد على نظام مزدوج يخلي العربية تشتغل بالغاز وقت ما تحب، أو ترجع للبنزين لو احتجت، كله بضغطة زر.
التحويل سهل وآمن
عملية التحويل نفسها سهلة جدا، بيتم إضافة شوية مكونات للعربية من غير أي تعديل في المحرك نفسه، قبل التحويل فيه فحص فني للعربية ولازم ما تقلش كفاءتها عن 70% علشان تتحول، وما تقلقش من موضوع الأمان، اسطوانة الغاز بتكون مصنوعة من الصلب تقيلة جدا، ومفيهاش لحامات، ومصممة تتحمل ضغط وتصادم مباشر من غير مشاكل.
توفير حقيقي كل شهر
لو ركزنا في لغة الأرقام هنلاقى التوفير واضح وكبير، وده اللي خلا كتير من الناس ترجع تحسبها، لو صاحب عربية بيصرف يوميا 10 لتر بنزين 80، هيلاقي نفسه بيوفر حوالى 2625 جنيه كل شهر لو اتحول للغاز، ولو بيستخدم بنزين 92 الوفر يوصل 3075 جنيه في الشهر، ولما يزيد الاستهلاك ويوصل 15 لتر في اليوم الوفر يعدي 4000 جنيه شهريا، الأرقام بتتكلم لوحدها، وعليه الإقبال الكبير ده.
الغاز الطبيعي بقى خلاص متوفر في أغلب محطات الوقود في كل المحافظات مع توسع كبير في الشبكة حسب خطة وزارة البترول، وبكده بقى حلم التوفير في متناول الجميع، سواء في العاصمة أو في أصغر مدينة في الصعيد، وكل يوم ناس جديدة بتجرب وتنبسط بالنتيجة.
الكلمات المفتاحية:
الغاز الطبيعي
تحويل السيارات للغاز
وزارة البترول
توفير البنزين
