فليك يختار مارتن لنهائي الكأس وسط جدل داخل برشلونة
قبل أيام من نهائي كأس الملك المنتظر بين ريال مدريد وبرشلونة، بدأت الخلافات تظهر جوه أسوار النادي الكتالوني، وخصوصاً حوالين مركز الظهير الأيسر اللي خلاه غياب أليخاندرو بالدي مصاب مفتوح للمنافسه.
صحف قريبه من برشلونة أكدت إن فيه أصوات في الأمانه الفنيه شايفه إن الأفضل يلعب حد عنده خبره، زي إينيغو مارتينيز أو إريك غارسيا، وحتى أراوخو دخل في الترشيحات، رغم إنه مش معتاد يلعب في المركز ده دايمًا.
لكن على الجهه التانيه، المدرب الألماني هانسي فليك عنده وجهه نظر مختلفه تمامًا، وبيفضل يعتمد على الشاب جيرارد مارتن، واللي شايف إنه مناسب أكتر، لأنه بيلعب برجله اليسار وشارك كذا مره في المركز ده الموسم ده.
فليك مقتنع إن مارتن عنده السرعه والتفاهم مع خط الوسط، وده هيساعد الفريق ضد خصم قوي زي ريال مدريد.
الجماهير بدورها منقسمه، في ناس شايفه إن الوقت مش مناسب لتجارب، وناس تانيه بتأيد فليك وبتشوف إن ثقة المدرب في الشباب جزء من فلسفة البارسا.
المباراه مش بس هتكون اختبار للاعبين، لكنها كمان هتكون فرصه لفليك يثبت إن اختياراته كانت في محلها والكل منتظر يشوف هل مارتن يقدر يثبت نفسه قدام الميرينجي؟
