ارتفاع أسعار الذهب يدفع لتراجع الإقبال على شراء الماس
في الوقت اللي الناس بتتهافت فيه على شراء الذهب وتحاول تحافظ على أموالها وسط الظروف الاقتصادية الصعبة والاضطرابات اللي بتضرب العالم كله، بيظهر سؤال محير: ليه محدش بيقبل على شراء الماس بنفس الحماس، رغم إن الذهب أسعاره ولعت وبقى غالي جدا؟ ولماذا لم يشهد سوق الماس نفس الرواج اللي بيشهده سوق الذهب النهاردة؟
الذهب ملاذ آمن والماس لأغراض مختلفة
لو جينا نسأل خبراء الاقتصاد وتجار المجوهرات، هنلاقي إن السبب الأول والأهم هو إن الذهب بيمثل ملاذ آمن ومعروف سهل تسييله في أي مكان في العالم، الناس دايما متعودة لما تضغط عليها الظروف تشتري ذهب عشان تحافظ على فلوسها، تبيعه وقت اللزوم بسهولة وسعره معروف وعالمي، لكن الماس حاجة تانية خالص، مفيش له سعر موحد، وتقييمه بيحتاج خبرة كبيرة لإنه بيتأثر بحاجات كتير زي النقاء واللون والوزن ونوع القطع، يعني اللي يشتري ماس ويفكر يبيعه ممكن يخسر كتير ومش هيعرف يلاقي حد يشتريه بسرعة.
مشاكل في البيع والمعرفة بالسوق
مشكلة تانية بتواجه الناس، هي صعوبة بيع الماس المستعمل، لأن التجار غالبا هيشتروه بأقل بكتير من سعره الأصلي وده بيخلي فكرة الاستثمار في الماس مش جاذبة لمعظم الناس، وكمان في نقطة مهمة، أغلبنا معندوش أصلا خبرة في الماس وتقييمه، وده بيخلي كتير خايفين يشتروا ويدفعوا فلوس في حاجة ميعرفوش قيمتها الحقيقية، غير كده أصلا السوق بقى مليان ماس صناعي وده قلل الإحساس بندرة الماس الطبيعية وزايد كمان من خطورة التلاعب أو الغش.
تغيّر تفكير الأجيال
مع تغير الزمن، الشباب بقى مش مهتم قوي بالمجوهرات والزينة زي زمان، وعايز يوجه فلوسه لحاجات تانية زي السفر أو تجارب الحياة مش للكماليات، وده كمان أثر على رواج سوق الماس.
صناعة عالمية ضخمة لكن خاصة
رغم كل ده، تظل تجارة الماس واحدة من أشهر الصناعات العالمية زي ما بيقول خبراء تجارة المجوهرات، الماس موجود في بلجيكا والهند وإسرائيل وهي اللي بتتحكم في بورصته وسعره، سعر الماس بيتحدد حسب النقاء والوزن واللون وجودة القطع، وغالبا الماسات النادرة زي الأزرق أو الوردي هي الأغلى، ولسه كل شوية بيظهر ماسات معمولة في المعامل بتكنولوجيا جديدة وأرخص من الطبيعي.
وفي النهاية، أفريقيا تعتبر من أهم قارات العالم لإنتاج الماس، والدول الأشهر زي بوتسوانا وروسيا وكندا وأستراليا والهند بتنافس بقوة في السوق، ورغم كل أهمية الماس وقيمته اللي ملهاش حدود في الصناعة والمجوهرات، يظل الذهب سيد الموقف في أوقات الأزمات، بينما الماس للمتخصصين وأهل الخبرة بس.
الذهب – الماس – بورصة الماس – بوتسوانا – روسيا – إسرائيل – الهند – القيمة السوقية
