فليك متمسك بإريك غارسيا.. رغم رغبة جيرونا واهتمامه الكبير
هانز فليك مدرب برشلونه الجديد واضح إنه مش ناوي يفرط في ولا لاعب هو شايف إنه ممكن يفيده، وده باين جدا من موقفه الأخير مع المدافع الإسباني إريك غارسيا، اللي كان نادي جيرونا حابب يضمه في الشتويه اللي فاتت، واللاعب نفسه كان عنده استعداد يروح لكن فليك قال لأ.
صحيفة سبورت الإسبانيه قالت إن فليك كان شايف إن غارسيا عنده امكانيات كبيره، مش بس كقلب دفاع لكن كمان يقدر يلعب في اكتر من مركز، وده بيخلي المدرب الألماني متمسك بيه كجزء مهم في خططه الفنيه.
الدليل على كده بان في ماتش برشلونه الأخير ضد مايوركا على ملعب مونتجويك، لما فليك قرر يجربه كظهير أيمن، وفعلاً غارسيا قدم مستوي حلو وخلى الناس تتكلم عنه.
غارسيا غير إنه بيلعب قلب دفاع، يقدر كمان يشتغل كلاعب ارتكاز دفاعي، يعني كأنه ورقه بيفتح بيها فليك كل الحلول، خصوصًا في ظل الإصابات وعدم الاستقرار اللي بيعيشه الفريق من وقت للتاني.
المدرب مش لوحده في الحكاية دي، إدارة برشلونه كمان شايفه إن اللاعب ممكن يبقى ليه دور كبير قدام، ومش عايزين يتسرعوا في بيعه خصوصاً وإنه لسه صغير ولسه قدامه كتير يقدمه.
الايام الجايه هتوضح إذا كان غارسيا فعلاً هيكمل وياخد فرصه أكبر، ولا هتتغير الخطه في الصيف.
