هبوط مفاجئ للذهب في مصر مع تراجع سعر الجرام 150 جنيها خلال أسبوع
سيطرت حالة من الترقب على سوق الذهب في مصر خلال الأسبوع الماضي بعدما سجلت الأسعار هبوطا واضحا، وفقا لما أكده إيهاب واصف، رئيس شعبة الذهب والمعادن الثمينة في اتحاد الصناعات، بسبب استمرار هبوط السعر العالمي للذهب، ومع استقرار سعر الدولار أمام الجنيه في مصر، لقى المعدن الأصفر خسائر كبيرة للأسبوع الثاني على التوالي، المصريون اللي كانوا معروفين بإقبالهم الكبير على شراء الذهب بغرض الاستثمار أو الادخار، بدأوا يهدوا شوية ويراقبوا السوق عن كثب، خاصة بعد فترة من الارتفاعات الحادة والقلق على قيمة الجنيه.
أسعار الذهب تتراجع في مصر
خلال الأسبوع ده، هبط سعر الذهب عيار 21 – اللي هو أكتر حاجة الناس بتشتريها في مصر – بحوالي 150 جنيه دفعة واحدة، وبقى الجرام بيتباع بـ4640 جنيه بعدما كان في بداية الأسبوع بـ4790 جنيه، ده غير إن العيار 24 سجل حوالي 5303 جنيهات للجرام، والعيار 18 نزل لـ3977 جنيها، أما العيار 14 فوصل لـ3093 جنيه للجرام، الناس اللي بتفضل شراء جنيه الذهب، بقوا يلاقوه سعره وصل لـ37120 جنيه (وده وزنه 8 جرامات عيار 21).
تراجع الطلب على شراء الذهب
وأوضح إيهاب واصف في تصريحات خاصة إن الفترة اللي فاتت كان تحريك سعر المعدن متوقف أساسا على سوق الذهب العالمي، خصوصا مع سكون سعر العملة في مصر، يعني الناس اللي كانت بتخاف من ارتفاع الدولار وبتهرول تشتري ذهب، الموجة دي بقت أهدى حاليا، كمان أشار لتقرير مجلس الذهب العالمي اللي وضح إن المصريين اشتروا في أول 3 شهور من سنة 2025 حوالي 11.1 طن ذهب بس، وده أقل بـ16% عن نفس الفترة السنة اللي فاتت.
توقعات مستقبلية
وبالنسبة للمستقبل، شايف واصف إن أسعار الذهب في العالم كله لسه بتنزلق بسبب قلة الإقبال على الملاذات الآمنة، وارتفاع الدولار الفترة دي مع هدوء نسبى في مشاكل التجارة بين الدول، وتحذير منه إن أونصة الذهب لو كسرت الدعم عند 3200 دولار، ممكن نشوف الهبوط يستمر أكتر، السوق المصري بيعكس ده كويس، لأن عيار 21 لمس أثناء الأسبوع أقل مستوى عند 4620 جنيه، وكان بيحاول يطلع تاني ويكسر نقطة مقاومة جديدة وسط ترقب المتعاملين وحالة من الحذر في الشراء.
واضح كده إن سوق الذهب في مصر داخل مرحلة جديدة، الناس فيها أكتر حِكمة وأقل اندفاع، وكل الأنظار دلوقتي على الأسواق العالمية وتغيرات سعر الدولار علشان يقرروا خطوتهم الجاية في الشراء أو البيع.
