مستقبل أنشيلوتي مع ريال مدريد على كف عفريت قبل كلاسيكو الكأس
لسه الشكوك محاوطه مصير المدرب الإيطالي كارلو أنشيلوتي مع ريال مدريد، قبل ساعات قليله من كلاسيكو الأرض ضد برشلونة فـ نهائي كأس ملك إسبانيا ع ملعب لا كارتوخا فـ اشبيليه.
أيام فاتت كلها كلام عن بدلاء محتملين، وعلى رأسهم تشابي ألونسو مدرب باير ليفركوزن، لكن لحد دلوقتي النادي ما طلعش بأي قرار رسمي بخصوص مصير أنشيلوتي، رغم خيبة الخروج من دوري الأبطال.
النهارده الريال هيحاول ينقذ موسمه بلقب كأس الملك، خصوصا بعد ما خسر من برشلونة مرتين السنه دي، مره برباعيه ف الدوري، وخمسية ف نهائي السوبر.
الصحفي الموثوق خوسيه فيليكس دياز قال إن أنشيلوتي ليه قيمه كبيره جوه النادي، والرئيس بيريز بيحترمه جدا، بعيد عن أصوات الجماهير الغاضبه.
فوز الريال بالكأس الليله وكمان المنافسه ع الدوري الإسباني، ممكن يكونوا طوق النجاه لأنشيلوتي، ويخلوه يكمل عالأقل لحد كاس العالم للأنديه فـ الصيف.
يذكر إن عقد أنشيلوتي مع الملكي ممتد لحد صيف 2026، والمدرب نفسه صرح اكتر من مره إنه عايز يعتزل وهو جوه ريال مدريد.
