جمهور الهلال يشعلها على البليهي بعد صورة دبي ويطالب برحيله فورًا
ولع جمهور الهلال السعودي على مدافع الفريق علي البليهي بعد ما نزل صورة له على حسابه الشخصي من داخل طيارة وهو رايح دبي، واللي ما طولتش على حسابه واتمسحت بسرعه بعد ما قامت الدنيا وما قعدتش!
البليهي اتعرض لهجوم كبير من جمهور الهلال، خاصة بعد أداءه الضعيف قدام الأهلي في نصف نهائي دوري أبطال آسيا للنخبة، واللي خرج منه الزعيم بخسارة موجعة. ناس كتير شافت إن توقيت سفره غلط، وإنه مش فارق معاه زعل الجمهور أو خروج الفريق.
الغريب إن الهجوم مجاش من جمهور الهلال بس، لا، ده جمهور النصر كمان دخل على الخط! وشافوا إن البليهي بيتعمد يحط مشروب لونه أصفر في الصورة، وكأنها تلميحة لخروج النصر من نفس البطولة!
كتير من جماهير الهلال طلبوا الإدارة بعدم التجديد للبليهي، وقالوا إن كفايه اللي عمله للفريق وإنه لازم يمشي في نهاية الموسم والسوشيال ميديا دلوقتي مولعة بتعليقات وغضب من كل الأطراف.
