أرتيتا مكسور بعد ضياع الدوري وهدفه دلوقتي المركز التاني
ميكيل أرتيتا، مدرب أرسنال، طلع وتكلم بصراحة قبل ماتش بورنموث اللي هيتلعب بكرة على ملعب الإمارات في الجولة 35 من البريميرليج، وقال إن الفوز بالماتش ده بقى ضروري جدًا علشان الفريق يفضل محافظ على مكانته في الدوري.
أرتيتا اعترف إن فقدان أمل التتويج باللقب مأثر عليه نفسيًا بشكل كبير، خصوصًا بعد ما قدر ليفربول يحسم الأمور لصالحه وقال في تصريح صريح: “هدفي دلوقتي إننا نخلص الموسم في المركز التاني، ده أهم حاجة حاليًا”. وأضاف كمان إن ليفربول كان الفريق الأكتر ثبات وده خلاه يستحق اللقب، بس ده مش بيمنع إن الموضوع وجعه جدًا.
المدرب الإسباني وضّح إنو مش بيتعامل مع الموسم على إنه فرصة بس عشان مانشستر سيتي فشل، لأن ببساطة، الكرة مش كده، ومفيش ضمانات حتى لو الكبار وقعوا.
أما بخصوص الموسم الجاي، فقال إن في نقاشات حالياً بتحصل حوالين تقليل الإصابات اللي واجهت الفريق الموسم ده، بس لسه في ماتشات مهمة في الدوري ودوري الأبطال، يعني الشغل مكمل والموسم لسه مخلصش.
أرسنال حالياً في المركز التاني بـ67 نقطة، ولو عايز يضمن الوصافة، لازم يكسب التلات ماتشات اللي فاضلين. والمهمة مش سهلة، خصوصًا قدام فرق هتلعب وهي مفيش حاجة تخسرها.
