ريم البارودي: كنت هقع ضحيه مع رامز جلال ورفضت التمثيل
كشفت الفنانة ريم البارودي عن كواليس رفضها الظهور مع رامز جلال فـ برنامج “رامز جاب من الآخر” اللي اتعرض رمضان 2024، وقالت خلال لقائها مع نزار الفارس فـ برنامج “من قريب”: “رامز جلال برامجه طبعا متفق عليها، بس في تريكات، مش معقول حد يديك أجر بالدولار ضعف اللي بتاخده فـ بلدك وطيران وإقامة ومصاريف، ويبقى كله طبيعي!”.
وأضافت ريم: “على ما أعتقد فيه حلقات بيبقى فيها ناس مش عارفين، بس بيكونوا الأقل ضرر اللي مش هيعملوا مشكلة، وأنا رفضت أشارك لما عرفت إن في تمثيل ومفيش مصداقيه”.
وكملت كلامها وقالت: “المعدة قالتلي المره دي لعب وهيظهر بشخصيته ومقالتيش الحقيقة، بس احنا كزمايل وأصحاب بنعرف من بعض، فعرفت إن في ضيف تاني معايا”.
وعن رأيها فـ رامز جلال وبرامجه قالت ريم: “رغم الانتقادات رامز ناجح طول السنين والناس بتتابعه”.
يذكر إن ريم البارودي شاركت فـ رمضان 2025 بمسلسل “جوما”، من إخراج محمد النقلي وتأليف أحمد صبحي، وبطولة ميرفت أمين ومحمود عبد المغني وفراس سعيد ومنة عرفة.
