طفرة عقارية ضخمة: عائد الاستثمار الأعلى في مصر وقفزات مذهلة في أسعار المتر بمدينة الرحاب
شهدت السوق العقارية في مصر تحركا كبيرا خلال السنوات الماضية جعلها محط أنظار المستثمرين والمتابعين، والسبب ببساطة أن الاستثمار في العقارات بقى الأعلى عائد في البلد مقارنة بأي وعاء استثماري تاني، والكلام ده جاي من مصدر موثوق، وتحديدا من هشام طلعت مصطفى، الرئيس التنفيذي والعضو المنتدب لـ مجموعة طلعت مصطفى القابضة، اللي كشف عن مفاجآت قوية تخص أرقام العائد العقاري في لقاء مع الإعلامي عمرو أديب في برنامج "الحكاية".
الاستثمار العقاري يتفوق على الذهب والدولار
هشام طلعت مصطفى قال إن مجموعة طلعت مصطفى عملت دراسة على العائد من الاستثمار العقاري في وحداتها على مدار آخر 40 سنة، وطلع رقم العائد السنوي بيوصل لـ26% كل سنة، الرقم ده، بحسب كلام هشام طلعت، بيتفوق بكتير على أي استثمار تاني زى الذهب أو الشهادات البنكية أو حتى الدولار، واللي ناس كتير بتحسبهم ملاذ آمن وقت الأزمات.
سعر المتر في الرحاب وصل لرقم خيالي
ومن ضمن أمثلة النجاح اللي ذكرها، وضح هشام طلعت إن سعر متر الوحدة السكنية في مدينة الرحاب لما طرحتها المجموعة في 1996 كان تقريبا 900 جنيه بس! ومع مرور السنوات والتوسع والتطوير، المتر في نفس المكان النهارده وصل لـ90 ألف جنيه، وده رقم كبير بيؤكد إن الاستثمار العقاري في مصر مش بس بيحافظ على قيمة الفلوس، ده كمان بيضاعفها بشكل رهيب.
نسبة أرباح خيالية في مشروعات جديدة
هشام ما اكتفاش بمثال الرحاب، وادى كمان مثال بمشروع ساوث ميد، لما قال إن اللى اشترى في المرحلة الأولى دفع بس 10% من قيمة الوحدة، وسعر الوحدة زاد بعدها 29% في سنة واحدة بس، وده يعني إن العائد الفعلي للعميل على فلوسه وصل لـ300%! رقم فوق الخيال في أي استثمار تاني.
وأكد هشام طلعت مصطفى إن المجموعة التزامها مع العملاء عالي جدا، ومافيش أي وحدة اتأخرت في تسليمها من أول ما بدأوا شغلهم، وده خلاهم عندهم أكتر من 1.5 مليون ساكن في مشروعاتهم بعد تسليم أكتر من 160 ألف وحدة خلال 50 سنة، وعندهم أكتر من 200 ألف عميل مستمرين معاهم.
واضح أن الاستثمار العقاري لسه مستمر في تحقيق أرقام استثنائية، خاصة مع أسماء كبيرة زي طلعت مصطفى، والناس اللي عاوزة تحافظ على فلوسها أو تحقق عوائد كبيرة قدامها فرص قوية في السوق العقاري.
